Монгол Улсыг эдийн засгийн өнөөгийн хүнд нөхцлийг даван туулахад нь туслах зорилгоор Японоос 850 сая ам.долларын зээлийг олгохоор болсныг Монгол Улсын Сангийн сайд мэдэгдэв.
Хятад, Оросоор хүрээлэгдсэн, далайд гарцгүй Монгол Улс 2 дугаар сард Олон улсын валютын сан болон бусад байгууллагаас 5.5 тэрбум ам.долларын санхүүгийн тусламж авах болсоноо мэдэгдсэн юм.
Мөнгөний гүнзгий дутагдалд ороод буй Азийн энэ улсын эдийн засаг өнгөрсөн онд ганцхан хувиар өссөн нь сүүлийн 7 жилийн хамгийн бага үзүүлэлт байв. Гадаадын хөрөнгө оруулалтын хумигдал, таваарын үнийн уналтаас үүдэн Монгол Улс төгрөгийн ханшийг барьж, өр зээлээ зохицуулахад ихээхэн саад бэрхшээлтэй тулгарсан юм.
Монгол Улсын Их Хурлын дарга Миеэгомбын Энхболдын Япон улсад хийсэн айлчлалын үеэр Японы талаас 850 сая ам.долларын зээл олгохоор болсон гэж Монголын Сангийн яамны албан тушаалтан мэдээлэв. Гэхдээ зээлийн асуудлаарх яриа хэлэлцээ хараахан дуусаагүй аж.
Монголиан Металс энд Майнинг-ийн шинжээч Дэйл Чой “Энэ удаагийн зээлийн хэмжээ нь Монгол Улс ардчилал, зах зээлийн эдийн засагт шилжсэнээс хойш Японоос олгосон бүх хөнгөлөлттэй зээлтэй бараг тэнцүү хэмжээтэй байна” гэжээ.
Японы энэ зээлээс гадна Монгол Улс ОУВС-гийн 3 жилийн хугацаатай Өргөтгөсөн санхүүжилтийн хөтөлбөрийн 440 сая ам.доллар болон Монголбанк, Хятадын Ардын банкны харилцан тохиролцсон своп хэлэлцээрээр олгох 15 тэрбум юань (2.18 тэрбум ам.доллар)-ийн зээл, тусламжийг авахаар болсон.
Япон, Өмнөд Солонгос улсууд 3 тэрбум хүртэлх ам.долларын тусламж олгоно гэж ОУВС 2 дугаар сард мэдэгдэж байв.
Гэсэн хэдий ч Монголын парламент 4 дүгээр сарын 5-нд эхлэх хаврын чуулганаараа дээрх санхүүгийн тусламжийн хөтөлбөрт хамрагдахаа баталгаажуулах шаардлагатай хэвээр байгаа.
ОУВС-ын хөтөлбөрийн хүрээнд Монголын парламент татварыг нэмэгдүүлж, нийгмийн халамжийг танах замаар орлогыг бий болгон, зарлагыг багасгах хуулийн төсөлд санал хураалт явуулах ажээ.
Монгол Улс Япон, Өмнөд Солонгостой худалдаа, хөгжлийн хамтын ажиллагаагаа тэлж буй нь тус улсын Орос, Хятадаас хамааралтай байдлаа багасгах зорилготой “Гуравдагч хөрш”-ийн бодлогын үр дүн юм. Мөн Монгол нь Хятадын эдийн засгийн өсөлт удаашрахад түүнд хамгийн ихээр нэрвэгдсэн улсуудын нэг байв.
Өнгөрсөн жил Япон, Монгол улсууд чөлөөт худалдааны хэлэлцээр байгуулснаар Монголын нүүрс, ноолуур тэргүүтэй тодорхой барааны импорт, экспортын тарифыг тэглэжээ.
ГБСХ-ийн судлаач гишүүн О.Баттулга англи хэлнээс орчуулав.
(c) Copyright Thomson Reuters 2017.
